Monsoon Update | मे महिना सुरू झाल्यापासून आभाळ काही केल्या उघडत नाही. उन्हाने भाजून काढणारा हा महिना यंदा मात्र अचानक आभाळ दाटलं, विजा कडाडल्या आणि बळीराजाच्या हातातोंडाशी आलेलं पीक झोडपून गेलं. महाराष्ट्रभर अवकाळी पावसानं अक्षरशः थैमान घातलंय. कोल्हापूर, सातारा, सांगली, सोलापूर, पुणे, मुंबई, विदर्भातल्या अनेक गावांमध्ये रात्रीच्या सुमारास पावसाच्या सरींनी लोकांना जागं केलं.Monsoon Update
शेतकऱ्यांच्या शेतात आधीच ओलाव्याचा अभाव होता, आता उगवलेला कांदा चिखलात रुतलाय. बीडच्या शेवगाव तालुक्यातल्या बबनराव कांबळेंच्या शेतात तीन एकर कांद्याचं पीक पूर्णपणे सडलं. “सांगा हो, असं उन्हाळ्यात पाणी पडतं का? गेल्या वीस वर्षात असं पाहिलं नाही,” असं ते हताशपणे म्हणाले.
आता हवामान खात्याने आणखी एक मोठी बातमी दिली आहे. यंदाचा मान्सून वेळेआधीच भारतात दाखल होणार आहे. केरळमध्ये २५ मेपर्यंत मान्सून पोहोचणार असल्याचं खात्रीनं सांगण्यात आलंय. म्हणजे नेहमीच्या वेळेपेक्षा आठ-नऊ दिवस आधी. हे मागच्या १६ वर्षांमध्ये पहिल्यांदाच होतंय. २००९ साली शेवटचं असं वेळेपूर्वीचं आगमन झालं होतं. त्यामुळे यंदा मान्सूनचा जोर जरा हटकेच राहणार, असं चित्र आहे.
पण त्याआधीच अवकाळी पावसानं आपली छाया टाकलेली आहे. कोकणात रेड अलर्ट देण्यात आलाय. सिंधुदुर्ग, रत्नागिरीसारख्या जिल्ह्यांत प्रचंड पावसाचा इशारा देण्यात आला आहे. काही ठिकाणी तर ढगफुटी सदृश परिस्थिती निर्माण होऊ शकते, असं हवामान विभाग म्हणतो.
विदर्भात अमरावती, अकोला, यवतमाळात रात्रीच्या वेळी आकाश कडाडतंय. धाराशिवमध्ये कांद्याचे पोते ओलेचिंब झालेत. उस्मानाबादमध्ये शेतात पाणीच पाणी झालंय. बळीराजाचा जीव टांगणीला लागलाय. कारण ही वेळ रब्बी हंगामात साठवलेल्या उत्पादनाची विक्री करायची. पण बाजारात नेण्याआधीच शेतात ओलसरता आणि सड झाली तर काय उरेल?
मुंबई-पुण्यात कालपासून पावसाच्या सरी लागत आहेत. मुंबईत कांदिवली, मालाड, दहिसर, अंधेरी अशा भागात मेघगर्जनेसह पावसाने हजेरी लावली. पुण्यात तर ५४ ठिकाणी झाडं कोसळली. रस्त्यावर पाणी तुंबल्यामुळे लोकांना ऑफिसला जाणं मुश्कील झालं.
हवामान खात्याचं सांगणं आहे की पुढचे ४८ तास महाराष्ट्रासाठी अत्यंत धोकादायक असणार आहेत. कोकणात मुसळधार ते अतिमुसळधार पावसाचा अंदाज आहे. दक्षिण कोकणात रेड अलर्ट देण्यात आला आहे. पुणे, सातारा, कोल्हापूर, सांगली या जिल्ह्यांना यलो अलर्ट देण्यात आला आहे. विदर्भात अकोला, वाशीम, बुलढाणा याठिकाणीही अलर्ट आहे.
लोकांनी शक्यतो घराबाहेर पडू नये, गरज असेल तरच प्रवास करावा, असं आवाहन प्रशासनाकडून केलं जातंय. पण गावागावात असे कोणते संदेश ऐकणारे किती? शेतकरी तर आपलं पीक वाचवण्यासाठी शेतात उतरले आहेत. गवतावर कापड टाकून कांदे झाकले जात आहेत, पोत्यांवर पॉलिथीन टाकून पाणी थांबवायचा प्रयत्न सुरू आहे. पण निसर्गासमोर कुणाचं काय चालणार?
ही परिस्थिती पाहता, यंदाचा मान्सून फक्त लवकर नाही, तर अधिक वेगळा आणि विचित्र असणार, असं जाणवतंय. हवामान बदलतंय, ऋतूंचं गणितच बिघडतंय. बळीराजानं तग धरणं आणि शासनानं वेळीच मदतीचा हात देणं, हेच सध्या गरजेचं आहे.
हे पण वाचा | Monsoon Update 2025 | या तारखेला महाराष्ट्रात दाखल होणार मान्सून, आली मोठी अपडेट समोर